Razzia na cas na Hooiberg a produci varios detencion

ORANJESTAD (AAN): Despues di varios dia di vigilancia, cu planning y suficiente prueba, a haya OK di Ministerio Publico pa autoridad hudicial y esnan anti-droga a tene un razzia riba Diadomingo anochi na un cas na Hooiberg.

   E oficialnan di Polis a yega diripiente, y a rondona e cas pa evita cu hende ta huy.  Uno a hasta cera e cranchi di meter di awa.

   Tur e oficialnan aki tabatin sosten di Polisnan di K9 Unit, oficialnan Anti-Droga, oficialnan forensico di BFTO, diferente Unidad di Polis, y tambe Fiscal.

   E habitantenan di e cas tabata disfrutando di un Diadomingo trankil, y a keda totalmente sorprendi.  Varios persona eynan a wordo aresta.  Algun di nan ta di exterior y no tin documento pa proba cu nan ta legal, y nan tambe a wordo aresta y pasa pa Guarda Nos Costa.

   Un di esnan deteni ta un muher kende tin un baby di algun luna.  Un agente policial femenino a tuma e baby over, mientras cu e muher a wordo aresta, pa asina e wordo transporta pa Warda di Polis unda e lo wordo interoga.

   Polisnan a keda basta tempo na e adres aki, pasobra a busca den tur skina pa asina adkiri prueba, y demas material necesario pa e investigacion.  Y como cu e caso aki ta uno ‘time-sensitive’, Ministerio Publico a haya necesario pa e razzia a tuma e ora ey mes, envez di e acostumbrado oranan di marduga.

   A tuma nota cu tabatin oficialnan di CEA tambe presente, pa asina yuda vigila y duna asistencia na e oficialnan di Polis.

   Na final, e vehiculo special di transporte di Polis a ser usa pa transporta diferente detenido rumbo pa Warda di Polis.

   Te cu ayeranochi laat, oficialmente Polis no a duna ningun detaye di e razzia aki na Hooiberg.