Accidente basta fuerte riba Green Corridor

Nissan a impacta frontal den takelwagen

ORANJESTAD (AAN):   Diabierna algo pasa di 7 or di anochi, un accidente basta pisa a sosode riba caminda di Green Corridor, den cercania di Hyatt Place Hotel.

Eynan un auto Nissan Tiida color blanco a dal den un takelwagen, tur dos bayendo direccion pariba.

E impacto tabata basta fuerte locual a ocasiona cu e parti dilanti di e Nissan a keda totalmente destrui y a laga e chauffeur herida.

Ambulans como tambe Polis a yega na e sitio pa asina atende cu e incidente. Polis a cera e caminda na altura di e rotonde cual ya caba tabata tin trafico stagna.

Paramediconan a atende cu e persona herida den ambulans. E glas di e windshield a keda basta destrui locual ta duna un impresion riba con fuerte e impacto tabata. E takelwagen tambe a haya basta daño.

Diabierna tabata tin un atardi basta druk pa autoridad como tambe pa ambulans cu mester a atende un ke otro suceso rond di Aruba.