ORANJESTAD (AAN): Alarma a wordo bati Diamars atardi laat, cu tin posiblemente dos turista cu a dwaal den henter e teritorio di Parke Arikok.
A sali na cla cu un grupo di 4 turista a drenta pa bay admira e tereno, cu mata y demas bestianan cu tin den e Parke. E grupo a dividi den dos, y ora cu atardi a yega un di e gruponan aki so a regresa bek na comienzo.
Mirando cu e otronan no a yega bek, a dicidi bati alarma na tanto personal di Fundacion Parke Nacional Aruba, como tambe Polis. A haya sa cu e dos turistanan ta personanan di riba 50 aña di edad, y no sa unda nan lo ta e momento ey. A tende cu nan lo a bay explora e area di rooinan.
Park Rangernan a dicidi cu nan tambe ta bay cuminza busca, y a logra haya mas Park Ranger cu a yega y asina a forma team pa bay check e partinan mas principal di e Parke pa mira si por topa cu e dos turistanan aki.
Polis a laga nan Helicopter tambe lanta vuelo pa asina for di halto por tin un mihor bista. Asina a bin descubri cu e turistanan aki a subi Sero Arikok y eyriba nan tabata den scuridad banda di e Antenna VOR di Aviacion Civil local.
Helicopter di Polis e ora a suministra iluminacion pa e turistanan por mira unda nan ta cana, pero un rato despues Park Rangernan a topa nan, y a duna nan un lift den Pickup bek te na e Centro di Bishitante. Pues nan tabata sano y salvo, djis bastante cansa di e canamento asina extenso.
