ORANJESTAD (AAN) E Relacionista Publico di Cuerpo Policial, Liliana Rasmijn, a menciona den entrevista cu Matutino DIARIO,
cu na Juni ultimo KPA a cuminza cu “Bodycam”, cu ta un proyecto piloto, cu a inicia den e Distritonan di Noord y di Santa Cruz, y awo a rouleer na Distritonan di Oranjestad y San Nicolas.
“Recientemente, 1 di September nos a rouleer, el a bay pa loke ta Playa, Distrito Oranjestad y San Nicolas. E ta bayendo bon y a zorg pa cada persona cu a use (esnan cu a use caba den e dos distritonan anterior) anota kico a bay bon, kico menos bon, con e ta bay ta. Tur hende, prome cu el a wordo uza den e dos distritonan aki di San Nicolas cu Playa, a haya full un charla atrobe, full splicacion con e ta, con e ta hinca den otro, unda mester haci’e, pasobra unda bo bay, bo mester di bo carchi, bo mester pon’e den mashin, e ora ey ta release e Bodycam, bo ta pidi’e, ora bo por bay cu ne con e ta graba”, Rasmijn a señala.
Liliana Rasmijn a agrega cu hopi hende tin e pensamento cu bo por ‘tamper’ (konkel) cu ne. E no ta mescos cu bo telefon cu bo ta graba y bo ta bay edit.
“E ta tuma imagen ora bo yega. Bo ta pon’e bek e ta saca imagen, e ta bay den un server na unda cu eynan, si mester di imagen e ora mester traha full un proceso, pidi mescos cu ora bo drenta un cas mester di un machtiging di Officier. Asina e proceso ta bay. Kiermen, bo por wak imagen pero bo no por edit ni haci nada cu ne. Esey ta un parti cu, mi ta kere cu den futuro ora caba di evalua completo, Korpschef conhuntamente cu Minister di Husticia, nan lo bay sinta na mesa cu tur cos eynan, pa wak cu esaki bira algo obligatorio. Corda bon aworaki ta un proyecto piloto” Vocero di Polis, Liliana Rasmijn a señala.
