ORANJESTAD (AAN): Na varios pais e ta algo cu ta socede regularmente. Na Aruba den pasado tambe, un accion asina a yega di wordo teni, y el a resulta exitoso.
Ta un asina yama accion pa colecta arma di candela.
Ministerio Publico y Cuerpo Policial Aruba (KPA) tin intencion di tene un accion di colecta arma di candela pa bringa posesion di arma di candela ilegal. Durante e periodo aki personanan por entrega nan arma di candela na polis anonimamente y sin castigo.
E intencion di e accion aki lo no ta pa resolve caso, sino pa kita armanan di candela for di caya. Desde comunidad ta sona basta tempo caba e grito pa tene un accion asina. E ultimo accion di colecta arma di candela anonimamente y sin castigo a tuma lugar na 2009.
Mas informacion tocante e accion di colecta armanan di candela (unda y ki tempo) lo sali pronto den DIARIO.
