Parlamentario Ricky Hoek ta informa:
ORANJESTAD (AAN) – Parlamentario Ricky Hoek a referi den conferencia di prensa di e Fraccion di MEP, na e maneho di idioma cu Minister di Enseñanza kier hiba, y pa esey el a institui un Comision.
E parlamentario a informa cu siman pasa tur fraccion di Parlamento a uni cu e Comision cu a wordo institui, specialmente e Minister di Enseñanza, pa wak con pa introduci un maneho di idioma cu ta cumbini nos pueblo mas, na largo plazo. Esaki tambe pa asina yuda mehora e sistema di enseñanza na Aruba.
Hopi idea tin si e comision ta hacie na Papiamento of na Hulandes, of un combinacion, pero mester tene semper na cuenta e idioma cu semper e poblacion ta expresa su mes, y ta sinti comodo cune, y den e caso aki, na Aruba segun ultimo censo, casi 90% di e poblacion ta expresa su mes na Papiamento.
E parlamentario a señala cu ora di papia enseñanza, principalmente di e fundeshi, esta Crèche, Kleuterschool y Scol Basico, ta hopi importante pa tin un manera di enseñanza cu ta yuda nos hobennan.
Hoek a indica cu nos ta gaba cu Aruba ta un pais unda ta papia cuater idioma, sinembargo si wak awendia, no tur hende ta domina e cuater idiomanan aki completo y debidamente.
El a agrega cu cientificamente a wordo comproba tambe, cu si e persona no por domina su propio lenguahe, e lenga nativo, na un manera adecua y na un nivel hopi halto, e ta haci un tiki dificil pa despues siña otro idiomanan y tambe con ta comunica den esaki.
Pesey, fraccion di MEP ta tuma e tarea di analiza y wak diferente opcion y rapport di estudionan cu a wordo haci den pasado, cu a sali caba riba e tema aki di maneho di idioma cu nos ta bay introduci, pasobra muy pronto tambe lo bay trata e aspecto aki, pa asina tambe tuma e miho decisionnan cu ta cumbini nos comunidad.
