Prome reunion den bario organisa pa Cuerpo di Polis tabata exitoso

150 persona a acudi na reunion di bario

ORANJESTAD (AAN):   Dialuna pasa a tene un reunion informativo y contacto cu e barionan di San Nicolas entre otro Sero Colorado, De Vuyst, Juan Morto, Lago Heights y Esso Heights, Diamantbergweg, Kustbatterij y vecindario caminda Polisnan di Bario pa pariba di brug a intercambia ideanan, preocupacion y sugerencianan cu habitantenan di e barionan aki.

                E prome reunion aki tabata uno exitoso caminda 150 habitante a acudi na e reunion informativo aki al estilo di “townhall meeting”caminda habitantenan por a expresa tur loke nan ta sinti.

                KPA kier a gradici diferente persona cu a yuda cu e prome reunion den bario. Sr. Rufo Anthony representante di Centro di Bario Lago Heights cu a brinda nos e centro aki cu tur su inventario na nos polisnan di bario pa por haci e reunion aki posibel

                Altocomisario drs. Ramon Arnhem cu a participa activamente for di comienso t’e final na e reunion y  a intercambia cu e habitantenan sintando den publico hunto cu nan. Nos kier a gradici hefe di polisnan uniforma bou encargo di Sra. Trudy Hassel. Kende su persona tambe a participa activamente den e reunion. Departamento di Bario ta bou di Sra. Hassel su encargo cu a bin cu e iniciativa aki pa tene reunion den e barionan.

                KPA kier a gradici e hefe di districto di San Nicolas Sr. Andy Young cu a acudi como habitante invita y manera e dicho ta bisa “Once a cop always a cop” a yuda cu e preparacion pa e anochi aki.

                Na departamento di comunicacion, prevencion y informacion di KPA cu a yuda cu e parti di comunicacion.

                Na final kier a yama un danki y gradici e habitantenan di barionan menciona cu a acudi masalmente na e reunion y ta contento cu nan a trece tur preocupacionnan, sugerencianan y ideanan dilanti pa conhuntamente por mehora e calidad di bida y e seguridad di nos habitantenan den e barionan.

                Polisnan di bario di pariba di brug San Nicolas lo continua cu e reunionnan informativo y di contacto aki den e barionan di pariba di brug. Keda pendiente pa e otro barionan cu tambe nos lo bishita y haci nos reunion di contacto.