ORANJESTAD (AAN): Hopi hende ta puntra pakico Crisis Team y Gobierno no a bin cu prohibicion riba aglomeracion (Samenscholingsverbod) mirando e cantidad creciente di casonan di Covid-19 tur dia.
Riba esaki, Alto Comisario Vanessa Tjon-Kock a splica cu por pone hopi medida y esey no ta e problema, pero mester midi kico ta prohibi.
Aworaki ta ainda den temporada di vakantie y berdad ta haya cu mayoria di hende ta riba caya. Ta purba di mengua cu e problema ta bira mas grandi di loke e ta, a enfatisa.
Tjon-Kock a sigui bisa cu e parti di aglomeracion por bira un medida cu lo por wordo introduci. Pero e ta depende con e hendenan ta comporta.
Ora di bin cu e medida di aglomeracion ta mare na un cantidad di hende cu por ta hunto riba caminda publico, Alto Comisario Vanessa Tjon-Kock a duna di conoce.
