ORANJESTAD (AAN): Alto Comisario di Polis, señora Vanessa Tjon-Kock a bisa cu preocupacionnan ta hopi grandi, no solamente den sector medico, pero tambe di parti di economia y hotelero.
Crisis Team por bin cu hopi medida. Cada siman por bin cu medida nobo, pero esey no ta e solucion pa por mitiga loke ta pasando awo. El a bolbe enfatiza cu Cuerpo Policial ta keda encarga cu controlnan. Pa loke ta trata lugarnan nocturno, cu actualmente ta e problema di mas grandi di contagio y di parti di KPA, ta e lugarnan mas dificil pa controla. El a splica cu Crisis Team ta implementa varios medida, pero mirando cu comportacion di comunidad pa loke ta trata exceso di alcohol riba camindanan publico ta asina grandi, automaticamente mester bin cu medida pa para esaki. A bin cu un Orario di Ciere di 12'or di anochi y no ta intencion di KPA pa pone un polis na cada establecimento pa controla si nan ta cumpli cu orario di ciere. Tur hende mester ta conciente cu e situacion ta hopi alarmante. Medidanan por escala na cualkier momento.
Apesar cu KPA ta haya hopi critica pasobra nan ta para actividadnan musical, cu of sin permiso, Aruba ta den un situacion cu mester controla e contagio den comunidad. Cada biaha cu Cuerpo Policial ta drenta den establecimentonan tin discusion y kehonan. E ta pidi pa doñonan di establecimentonan ta conciente di e situacion y tuma precaucion. Cuerpo Policial no ta esun cu mester cera e lugarnan tur dia of controla si e musica ta halto y tampoco si e lugar ta asina yen cu mester saca hende for di lugar. Como doño di establecimento, ta su responsabilidad pa tuma tur precaucion.
