ORANJESTAD (AAN): Manera ta conoci, parti di e Paperclip Rotonde na Sero Patrishi ta cera e dianan cu a pasa, debi cu ta pone tubo grandi di drenahe bao di caminda.
Pa e motibo ey, e caminda di Sero Blanco pa Sero Patrishi ta cera, y trafico tin di pasa via di San Barbola y Yanana pa por subi Watty Vos Boulevard.
Ni maske cuanto a publica di e cruzada aki cera, parce cu toch tin algun chauffeur cu no ta lesa noticia mas.
Pesey mes, Diadomingo madruga pa 1:05 am, yamadanan a drenta na Polis cu un auto a bay dal den e baricadanan cu a wordo poni na Sero Blanco.
Polis di Playa a ser manda na e lugar, y ora cu nan a yega nan no a bin haya ningun auto. Pero si a mira cu tin un lastro largo di brake cu un auto lo a dal, y tambe algun glas kibra posiblemente di headlamp of di parkinglights. E baricada tambe tabata benta abao.
E auto mes no tabatey mes. E chauffeur lo a haye obliga na guli manda abao cu e mes ta culpable di no a mira e baricada, y mester a bandona e lugar.
E borchi di aviso y baricadanan mes no a haya daño, y e ora e Polisnan mes a dicidi na haci nan best y a pone e baricadanan bek na nan posicion original, pa asina keda adverti demas automobilistanan.
