ORANJESTAD (AAN): Un di e mensahenan di Nacionnan Uni su oficina riba Droga y Crimen, ta cu “Deporte ta yuda hobennan keda leu di crimen”.
Pero ta parce cu un grupo di hoben cu Diasabra atardi a acudi na veld di Unistars simplemente no ta interesa mes den deporte sano, y mas bien ta sigui mustra cu nan ta pertenece na e ‘thug’s life’.
E veld di Unistars ta situa na Pos Chikito, como 95 meter panort di Botica Aloe. Regularmente sa tin wega eyriba di varios division di futbol na Aruba. Den oranan di atardi sa mira gruponan cu ta use pa training, pa wega, of wega amistoso.
Un wega tabata andando Diasabra atardi riba e veld ey, cu varios persona sinta na banda ta mirando esaki. Diripiente un grupo di hoben a yega y tabata bisto cu nan a bin pa ‘regla cuenta’ y busca problema.
E wega a stop y a bira un sorto di pelea, unda na dado momento esaki a escala te riba veld. E grupo tabata decidido pa busca problema cu e otro grupo, y diripiente un machete a aparece como arma di menaza.
Mesora yamadanan a cuminza drenta na Polis pa raporta e situacion aki. Dado momento testigonan a mira algo parecido na un arma di candela tambe riba veld, y despues a mira con e grupo di hoben a core bay nort.
Pa 6:25 pm, Central di Polis a dirigi patruyanan di San Nicolas, hunto cu tur otro unidad riba caya, incluyendo Polis di Santa Cruz pa acudi na e lugar.
Polis a yega y ora di yega, un ciudadano a mustra Polis cu un grupo di hoben a ranca careda bay mas panort den Pos Chikito. Polis tambe a bay direccion ey, y tiki mas leu a bin topa un grupo di cinco hoben canando riba caya.
Ora cu e hobennan aki a mira Polis ta yegando, dos di e cinco hobennan aki a cuminza core bay. Uno a core direccion pariba rumbo pa mondi, y e otro a core direccion pabao pa e area di mas cas. Tres otro hoben a djis keda para eynan.
Polis a papia cu e tresnan aki, y nan a declara cu nan a djis bay veld di Unistars pa wak wega di futbol. Diripiente nan a wordo acerca pa hendenan cu tabata den un Toyota Yaris preto. Un par di hoben a baha for di e auto aki cu un machete den man, y segun nan storia, pesey nan a haya miedo y a core bay panort. E hobennan a bisa Polis tambe cu nan no tin problema cu ningun otro hende cu tabata riba veld, y nan no sa tampoco kende e hendenan den e Yaris ta.
Pero un otro unidad di Polis cu tambe a yega na veld di Unistars y papiando cu demas testigo, y el a bisa cu e hobennan cu a core bay nort na pia tabata hungando futbol y e Yaris tabatey basta rato prome caba. Y nan a indica cu ta esnan cu a core bay nort tin arma blanco den nan poder. Mesora e unidad aki a notifica e otronan via Tetra-Radio. Tambe a haya informacion cu un hoben cu T-shirt cora bisti tin un arma di candela den su poder.
Ora cu e unidad hunto cu e hobennan a tende esaki, nan a dicidi na rista nan curpa. Durante esaki, den poder di un hoben a haya un cuchiu di cushina cu cabo geel, y un otro cuchiu di cushina cu cabo oranje, cu tabata abao benta mey-mey di su pianan.
A base di esaki, Polis a detene e hoben di inicial C., pasobra a viola Articulo 1 di Ley di Arma na Aruba. El a wordo transporta cu Vehiculo Special pa Warda di Polis na San Nicolas unda el a wordo poni pa interogacion. E cuchiunan a wordo confisca.
