El a guli hopi awa
ORANJESTAD (AAN): Diadomingo atardi banda di 2:10 pm, unidad di Strandpolitie a wordo manda cu urgencia pa na Eagle Beach pa un persona cu a guli hopi awa di lama.
Polisnan a yega hunto cu Ambulans eynan, y a mira cu e victima ta poni na canto drumi, y tin algun persona rond di dje. Polis a mira cu e victima ta na tino.
Yegando cerca, e persona a bisa cu e ta sinti hopi dolor na su cabez. Paramediconan a yega cu nan aparatonan pa check-up, y a cuminza ofrece yudanza medico.
Un persona eybanda a bisa Polis cu el a mira e homber drenta lama cu un ‘float’ pa e keda drief, y ora cu e tabata riba lama, diripiente un ola grandi a pushe hopi duro, pa cual su cabez a bay dal fuerte na fondo di lama. Despues di esey nan a mira e homber cuminza drief riba awa.
Un otro persona eybanda a reacciona, y como cu e ta mas cerca di e victima, el a drenta hunto cu un amigo di su yiu muher pa saca e victima di lama e momento ey. Nubianan tabata basta scur den e area e momento ey, cu algun biento fuerte.
E victima tin 71 aña di edad ta un bishitante, pero el a bisa cu e tin famia na Aruba. El a bisa si e keda bon, e lo viaha bek pa Merca.
Personal di Ambulans a dicidi ta mihor pa hiba e victima pa Servicio di Emergencia na Hospital, pa haci mas test y demas tratamento medico pa check si e golpi por a causa un of mas trauma.
Un palabra di danki na esnan cu a reacciona rapido pa saca e victima di awa. Na final a pone Central di Polis na altura.
