ORANJESTAD (AAN): Accion un biaha mas riba Lama grandi pabao di Aruba, ora cu oficialnan di diferente pais a haya nan ta persigui un speedboat tipo GoFast cu a caba di sali for di costa Colombiano y ta moviendo bayendo panort riba Caribe.
Autoridadnan Colombiano ta cooperando hunto cu Marina Hulandes, y tambe e agencia Joint Inter Agency Task Force (JIATF Southern Command) di Merca pa vigila y stop actividadnan di contrabando di droga riba Lama Caribe y Golfo di Mexico. Y den cuadro di e cooperacion aki, den fin di siman nan a logra di confisca mas di mey ton di cocaina cu tabata abordo di un GoFast.
Un avion di Forza Aereo hunto cu e unidadnan di otro paisnan a detecta e speedboat aki cu tabata moviendo e momento ey como 225 km pabao di Punta Brabo na Aruba.
For di e avion por a mira cu e speedboat tin 3 hende abordo, y cu nan tin varios bulto y tambe tanki di gasolin abordo. A core pone unidadnan di Guardacosta di Cartagena tambe den e accion, y nan a baha nan unidad di Rapid Response pa bay stop e GoFast.
Ora cu esnan den e GoFast a ripara cu Guardacosta ta yegando cerca, nan a trata di huy y no kier a stop. Nan a haci varios maniobra pa desvia di e oficialnan. Porfin na final a logra stop nan, riba lama grandi panort di Cabo de la Vela, na La Guajira, Colombia.
Abordo di e GoFast a bin haya dos Dominicano, y un Venezolano. Tabatin en total 24 bulto cu a wordo confisca. Den e bultonan a haya un total di 600 paki rectangular.
Na tera a haci test riba e droga, y el a resulta positivo pa cocaina. E peso a yega na 598 kilo. E droga a wordo confisca y treci tera unda autoridadnan Colombiano lo destrui esaki inmediatamente.
