Polisnan di Aruba y varios otro pais a tene nan marcha den Oranjestad

Internationale Korpsweek 2026 Aruba

ORANJESTAD (AAN): Manera ta conoci Cuerpo Policial di Aruba (KPA) ta den e luna di celebracion di nan 40 Aniversario como entidad independiente, desde cu Aruba a adkiri su Status Aparte, na aña 1986.  Pesey nan ta organizando “Internationale Korpsweek 2026 Aruba”, cu e tema ‘Sirbiendo Comunidad cu Integridad y Sigurirdad.   Nan ta haciendo esaki cu Polisnan di Aruba hunto cu agentenan invita for di Hulanda, Corsou, Bonaire, St. Maarten, Saba, St. Eustatius, y Suriname.

   E delegadonan a cuminza yega Diabierna, y ya caba anochi tabatin un Welcome Party na Balashi Garden.  Diadomingo mainta a cuminza cu un Santo Sacrificio di Misa na Pro-Catedral San Francisco na Playa.  Despues di esey a sigui cu un Marcha di Polisnan, incluyendo tur delegado cu a bin Aruba.   Nan a marcha for di Pro-Catedral San Francisco te cu Renaissance Conference Center.  E marcha a wordo habri cu brassband di Scouting Aruba, sigui pa e aspirantnan di Scol pa Polis Aruba, sigui pa e paisnan presente.

   Hopi notabel ta cu e delegacion di Polis di Suriname a bin cu nan mesun brassband pa acompaña e parada, y esaki a wordo bon ricibi.  Na Convention Center tabatin un almuerso pa nan.

   Diadomingo anochi tabatin un recepcion na Renaissance Conference Center cu e tema ‘Touch of Gold’, cu animacion di grupo musical.

   Henter e siman aki lo tin wega di Volleyball, Bolas Criollas, Tiramento, Domino, Song Festival, Mens Erger Je Niet Live, y tambe un Conferencia.

   DIARIO ta desea Cuerpo Policial di Aruba hopi pabien, y pa disfruta di tur actividad, ohala tur acompaña pa nan famia. Danki KPA pa boso compromiso y lealtad cu pueblo di Aruba. Dios yena boso cu bendicion, salud y forza pa ehecuta dignamente y cu amor, un trabao pa comunidad, cu no ta facil.