Diector di CEA, Richard Kramers:
ORANJESTAD (AAN): Matutino DIARIO a entrevista e ex-miembro di KPA, señor Richard Kramers, pa varios decada a sirbi nos pueblo como polis. Señor Kramers ta participando den e eventonan rond di celebracion di 40 aña di Cuerpo Policial Aruba. Actualmente, señor Kramers ta Director di Cuerpo Special Arubano (CEA).
“Awe nos ta celebrando 40 aña di Cuerpo Policial di Aruba, aunke eigenlijk nos Cuerpo Policial ta existi prome cu 1986. Pero na 1986, ora cu Aruba a haya su Status Aparte, a los e Cuerpo for di loke ta yama Korp Politie van Nederlandse Antillen.”
Durante e celebracion aki, tin un Siman di Polis, unda cu e polisnan di Curacao, Bonaire, St. Maarten, Saba y St. Eustatius, tambe Suriname y Hulanda, ta bin Aruba pa participa den actividadnan deportivo, y tambe den e Song Festival. E ta mas un siman di hermandad, unda tur e miembronan di e diferente Cuerponan, unda diferente polis di Aruba a yega di traha na Curacao, Bonaire y Isla Ariba, y tin di Curacao cu a traha tambe aki na Aruba, nos a bin hunto despues di algun aña, pa un celebracion mas tanto di hermandad.
“Aworaki KPA tin hopi polis jong, mi tambe a cuminza jong 32 aña pasa, cu 18 aña. Antes, si bo tabata tin cierto haltura no tabata tuma bo den polis. Pero a dicidi pa kita e parti ey pasobra nos a keda sin tuma bon candidatonan pa motibo di haltura, cu tin un bon educacion pero pa motibo di ta cortico. Pero aworaki no ta wak haltura mas, basta bo ta un bon aspirant. Pesey bo ta mira basta aspirant jong”, señor Kramers a duna di conoce.
