Polisnan di Aruba y Corsou a finaliza cu exito un curso di siguridad di bom

Asina ta inverti den personal...

ORANJESTAD (AAN): Tanto Cuerpo Policial Aruba (KPA) y Cuerpo Policial Corsou (KPC) a participa na e curso intensivo di Team Leider Explosieven (TEV). Un total di cinco agente policial a forma parti di e training aki, esta tres di Aruba y dos di Corsou.

   E curso aki tabata consisti di diferente modulo structural. Entre otro, e participantenan a siña con pa analisa un ‘bommelding’ corecto pa asina determina categoricamente si ta trata di un menaza real of no. Tambe a duna instruccion riba con pa dirigi, guia y informa e agentenan cu ta fungi como bomverkenners (explorado di bom) riba e tereno aki.

   E training structural aki a wordo organiza y duna pa e specialistanan di Defensa Hulandes. Despues di algun siman sumamente intensivo, tur e agente policialnan di KPA y KPC a logra pasa nan examen final cu exito.

   Cuerpo Policial Aruba ta sigui inverti den e profesionalismo di su personal. E vision di Altocomisario Ramon Arnhem ta keda enfoca riba inversion continuo den e agentenan policial, facilitando cursonan di halto nivel pa asina garantisa un Cuerpo Policial debidamente entrena y prepara riba tur materia y tur nivel.

   Cuerpo Policial Aruba ta felicita e oficialnan di KPA y di KPC pa nan esfuerso, dedicacion y trabao duro. Nan ta orguyoso di e logro aki.