Unit Narcotica di Cuerpo Policial a 'canta bingo'
ORANJESTAD (AAN): Den un accion coordina riba lama, Unit Narcotica, den colaboracion cu UGC (Departamento di Crimen Organisa), Guarda Costa, Team di Aresto y Unidad K-9, a logra confisca un cantidad grandi di droga riba lama diaranson 5 di augustus. Segun informacion di polis, ta trata di marihuana y cocaina.
Relaciona cu e caso aki, e mesun anochi a detene un homber cu inicialnan E.R.G., naci na Colombia. Despues, polis a realisa un entrada hudicial na un parcela na Seroe Blanco. Durante e accion, tres persona indocumenta tambe a wordo deteni y entrega na Guarda Costa.
Unit Narcotica a sigui cu e investigacion y, riba diahuebs 13 di augustus 2026, Team di Aresto a detene un homber cu inicialnan R.R.A.M., naci na Aruba, na un parcela na Johan de Wittstraat.
Na e parcela, Unit Narcotica a confisca un suma considerable di placa. Polis no ta descarta cu tin mas detencion den e dianan venidero.
Cuerpo Policial ta haci un apelacion na cualkier persona cu a mira of sa algo relaciona cu e caso pa yama e tiplijn di polis na 11141. Polis ta garantiza anonimato.
