Polis ta keda nota cu smartphone den man di chauffeurnan ta ocasiona basta accident

Vocero policial Liliana Rasmijn:

ORANJESTAD (AAN): Corda semper cu ora bo ta den trafico, abo como chauffeur tin di percura pa bo maneha bo auto na un forma cordial y evita di trece situacion di peligro pa otro automobilistanan.

   Pesey na Merca mes tin algun estado caminda na cierto cruzada peligroso ta pone e borchi di ‘Drive Friendly’, pues bo tin di coopera cu demas automobilistanan y no djis kere cu abo ta doño di caminda.

   Ultimo lunanan tin varios observacion ta circula, cu ta parce comosifuera cu seguridad den trafico na Aruba a tuma un buelta cu no ta asina admirable.

   Vocero di Polis, Liliana Rasmijn a indica cu enberdad ta notando e trend di e ultimo lunanan, caminda tur automobilista ta druk, tur automobilista ta pura, e cordialidad ta laga hopi di desea.

   “Ban ta hopi mas trankil,” Rasmijn a enfatisa durante un entrevista cu DIARIO.  Loke ta mas importante ta pa evita di tin e smartphone den man, pasobra mayoria di accident cu ta registrando na Aruba ta e ‘dalmento den cadena’.  Pues chauffeur ta lesando message riba su smartphone, y no a ripara cu autonan su dilanti a stop.  Y asina ta dal den otro.

   E potret aki mes ta mustra un di e casonan aki cu a socede e siman aki riba Green Corridor, unda chauffeur no a regla su velocidad na tempo y a bay dal tras di otro, cu asina a keda dal den esun dilanti.  Polis y Roadservice a acudi pa duna asistencia, y bon mes cu ningun hende a sali herida.

   Segun Rasmijn, automobilistanan tin di pone atencion constante riba trafico y sigui reglanan di caminda.

   El a mustra cu Cuerpo Policial di Aruba a start un campaña pa yuda concientisa pero ta keda na cada chauffeur pa cumpli cu e reglanan.  “No corda cu ta abo so mester yega cas, sino esnan rond di bo tambe cu ta haci uso di caretera tambe tin di yega cas.”

   Vocero di Polis a admiti cu nan ta haciendo control tur dia, aunke Cuerpo Policial no ta anuncia nan, pero toch cada momento tin patruyanan ta vigilando movimento di trafico y percura pa bo documentonan di auto ta importante y valido, principalmente aseguro di vehiculo.

   Si acaso bo wordo haya ta core un auto sin aseguro, esaki automaticamente nifica cu Polis ta confisca esey, y ta laga kit’e di eynan cu Takelwagen.  Si Polis garabo sin rijbewijs valido, e ta pone cu lo bo keda deteni.  Pues tur esey ta ponebo cu bo tin di corda riba e consecuencianan.

   Aki DIARIO mes ta agrega, cu riba e website di Ministerio Publico mes ta poni cu esnan gara sin rijbewijs, lo haya un boet di 550 Florin.

   Pues lo bo hayabo cu gasto e momento ey!  Si acaso nan bay cu bo auto, bo tin di bay paga pa e Takelwagen y tambe paga pa cada dia cu e auto a keda wanta na Warda di Polis.  Pues e consecuencianan ta serio.

   Mirando e hecho cu ya caba Aruba a registra 9 morto den trafico pa 2023, vocero Liliana Rasmijn ta haci un suplica na automobilistanan bay mas trankil e ultimo simannan di aña y pa evita cu lo por tin mas tristesa den hogarnan di Aruba.