Polis na Aruba ta introduci 'Bodycams' tambe

Entrante Diamars venidero

• E ta cuminsa como un proyecto piloto 

ORANJESTAD (AAN): Cuerpo Policial Aruba no ta para keto. Nan ta scucha comunidad y hunto cu avancenan tecnologico e organisacion ta den pleno desaroyo pa ehecuta proyecto nan nobo cu ta encera cambionan grandi tanto pa Cuerpo Policial Aruba y comunidad.

   No ta un secreto bou di mando di altocomisario Arnhem su vision ta pa desaroya nan agentenan policial como tambe parti di digitalisacion cu enfoke riba tecnologia. Den e cuadro aki tin yen proyecto den tapara y ta andando manera: Radio di Polis nobo y moderno, Computernan nobo, Radarkamer, proyecto di Camera rond Aruba, proyecto di computer den patruya policial, tecnologia pa combati crimen etc.

  E meta y vision di KPA ta inverti den nos profesionalismo. E siguiente fase aki ta un stap grandi pa nos di Cuerpo Policial Aruba cu introduccion di e proyecto Piloto di Bodycams entrante 1 juli 2025.

   Bodycams ta un impacto nobo pa tur: Estudionan a demostra cu bodycams ta contribui na transparencia, seguridad y profesionalismo. E puntonan aki ta cuadra netamente cu e pensamento di nos organisacion policial. E meta ta pa fortalece transparencia y profesionalismo cu ta aumenta e seguridad pa nos comunidad y agente policial.

   E proyecto aki ta Piloto. Polis uniforma lo cuminsa uza e bodycams. A regla cu Polis por usa e bodycams na cualkier momento den nan ehecucion di nan trabou. E agentenan a haya presentacion di e procedura con pa atende cu e bodycams. Tin regla y procedura pa cu e maneho di e imagenan di e bodycams conhuntamente cu Ministerio Publico. No por divulga of mira imagen sin cu tin autorisacion pa cu esaki y e ta conta tambe pa nos di Cuerpo Policial Aruba pa asina brinda e transparencia y seguridad.

  Bodycams por trece reto pa comunidad y cu tempo por custumbra cu esaki. Hunto ta dal un stap dilanti cu e bodycamsnan tanto pa comunidad y agente policial.

   Den region y Aruba ta sigui crece y bira profesional. Nan tambe kier crece hunto door di inverti den e confiansa entre Polis y comunidad.  Polis tey pa boso! Hunto ta traha pa un Aruba sigur, resiliente y transparente.