ORANJESTAD (AAN): Recientemente Cuerpo Policial di Aruba a duna un advertencia na comunidad,
como cu nan a nota un aumento drastico di hortamento di motorcyclenan di e marca AKT na Aruba.
Ta trata di sea Scooter, Motrocycle, of Quadracer. E marca AKT motos ta un compania Colombiano cu ta specializa den esaki, y ta produci brommernan pa trabao, deporte, y aventura, cu motor cu ta varia di 150cc te cu 250cc.
Diadomingo alrededor di 4’or di marduga habitantenan den un area di Sero Blanco a lanta debi na desordo. Esnan cu a lanta a capta un auto color shinishi sospechoso, o sea cu no ta di eybanda.
E zonidonan tabata bin di un cas, unda cu ladronnan posiblemente vincula cu e auto shinishi tabata sacando no 1 pero 3 quadracer (vehiculo ATV) marca AKT for di e cura.
Testigonan lo a sigui nan, pero yegando area di Tarabana a perde nan for di bista. Doño di e aparatonan mesora a notifica polis pa haci denuncia.
Loke e ladronnan aki no a tene cuenta cu ne tur e camaranan di seguridad tin rond, sin conta esunnan na hopi cas awendia.
DIARIO a compronde cu ya caba autoridad lo tin pista di ken ta tras di e operativa anti-social aki, y mas cu claro un ora pa otro ta desbarata nan.
