Polis dunando alumnonan informacion riba tumamento di decision

ORANJESTAD (AAN): Sigur ta di aplaudi e iniciativa aki di Juliana School cu ta yuda alumnonan cu informacion valioso riba kico nan tin di pensa riba dje ora cu nan ta bay tuma decisionnan importante den e bida nan dilanti.

   E por ta alumno selectando ki scol nan lo sigui despues, ki amigonan ta escoge.  Mientras cu nan haya mas edad, decisionnan por bira mas dificil, pues ta importante pa siña nan e habilidadnan corecto di un edad hoben caba pa nan tin un claridad riba e asunto.

   Juliana School a invita Polis di Bario, pa bay duna un charla pa Klas 1 di e MAVO School aki, y a papia grandemente riba “consecuencia di decision”.

   Specialmente ora tin un decision cu ta afecta e alumno, ta bon pa nan consulta cu sea nan mayornan of hasta cu docente na scol mes, y discuti asina e escogencianan hunto.  Un fenomenal idea esaki tabata!