Dialuna atardi
ORANJESTAD (AAN): Net riba Dia di Himno y Bandera, esta Dialuna 18 di Maart, banda di 4:50 pm, Central di Polis a core manda patruya di San Nicolas rumbo pa e rumshop cerca di Rotonde Pos Chiquito di Green Corridor, caminda cu tin un pelea andando y cu hendenan ta tirando boter di cerbes riba otro.
Ora cu Polis a yega, sinembargo a bin nota nada particular. Agentenan a papia cu un di e bendedornan di e rumshop, pero el a bisa cu e no a mira nada.
Un par di rato despues, Polis a ricibi yamada di un persona den cercania, kende a splica cu no tabata trata aki di un caso di pelea, sino mas bien un tiramento. E testigo tabata eynan, y el a splica cu el a mira un homber sinta den un vehiculo tipo SUV, kende a los tiro contra un grupo di persona cu tabata para banda di e brug di peaton na e rotonde ey. Despues e auto a djis core bay.
Relaciona cu esaki, Polisnan a core pone Recherche na altura, y a cuminsa move di e lugar bay.
E rapport oficial di Polis ta splica cu nan Hefe di Servicio a indica cu atrobe un otro persona a bay informa un bendedor na e rumshop cu tin tiramento pafo. Pues Polisnan a bolbe regresa na e area di rotonde, e brug, y e rumshop. Nan a keda check abao si por mira huls, pero no a haya nada.
Algun persona a yega cerca di Polis, y nan a splica cu nan tabata para banda di caminda grandi. Uno di nan a informa cu anteriormente tabatin un discusion pisa entre un grupo di hoben. E grupo aki aparentemente ta e “Gang di Pos Chiquito”. E gang tabata sinta bao di un palo di mata cerca di e brug di peaton.
Testigo a splica cu ni un par di minuut despues, e vehiculo SUV a bin bek, a core pasa banda di e rumshop y bay direccion pariba, y despues el a bira bek y bin pabao direccion di esnan cu ta para cerca di e rumshop. Hendenan mester a hala un banda pa asina nan no wordo atropeya door di e vehiculo. E persona tras di stuur di e SUV ta un hoben, cu cabey preto largo, cu color di cuero blanco. Como pasahero tabatin un otro hoben sinta dilanti. E biaha aki a mira con e chauffeur a mik un arma di candela color preto, cu ta parce un Glock. El a dirigi esaki den direccion di e Gang di Pos Chiquito. Despues a tende un tiro. Esaki a pone cu varios hende a core bandona e area. Un testigo a mira con un hoben di e Gang, tambe a saca un arma preto for di su heuptas, y a dirigi esaki riba e vehiculo SUV. Despues nan a tende un otro tiro. Aki mesora e SUV a core bay, y un otro auto blanco tambe tras di e SUV.
Polis a bay check Security Camera den e vecindario, y a mira tur esaki tambe. Polis a tuma tur dato, y awor e caso ta den man di Recherche.
