Tres persona hoben deteni
ORANJESTAD (AAN): Diadomingo anochi banda di 9:35 pm, unidad di Polis di Noord coriendo riba caminda di Palm Beach pa Noord, un tiki pariba di e rotonde di Palm Beach dilanti un Supermarket, nan a mira un auto compacto Zotye Z100 color berde staciona dilanti e porta di e negoshi. Agentenan a mira un hoben baha di e auto y a cana bay na entrada di e Supermarket. E momento ey e agentenan a haya holo hopi fuerte mes di marihuana, cu tabata sali di e auto aki.
Agentenan a dicidi na bira nan unidad y bay bek pa para banda di e auto. Y ora di para, e agentenan a ripara cu e hoben cu un rato prome a baha bay na e entrada, ya a drenta bek den e auto. Ora cu e unidad di Polis a para banda di e auto, e holo fuerte di marihuana a bolbe wordo sinti, pues ta di e auto ey mes e ta saliendo.
Polis a haya sospecho cu den e auto lo por tin droga. Agentenan a bay puntra esnan den e auto si nan tin articulo prohibi eyden. Aki e chauffeur a contesta “si”, y e persona aki mes a entrega na agentenan un sakito transparente di plastico conteniendo marihuana. E chauffeur a wordo identifica como e persona di inicial G.
Mientras tanto un otro unidad di Polis mas a yega eynan pa duna sosten. E ora Polisnan a pidi e demas ocupantenan pa nan baha. Un pasahero sinta patras a baha cu un sakito den su man. E pasahero di inicial L. a wordo puntra ta kico e tin eynan. Aki e pasahero mesora a bisa cu ta sakito di marihuana, y el a entrega esaki na Polis. Pero Polis a mira cu ora e ta dunando e sakito cu marihuana, a mira cu e tin un otro sakito den man cu ta mustra di ta puiro di cocaina.
E mesun momento ey, Polis tabata listrando curpa di e otro pasahero cu tabata sinta dilanti banda di chauffeur. E pasahero aki di inicial R. Den su paña, pues den su poder a haya basta placa cash.
Despues di esey, Polis a mira cu na e asiento di pasahero dilanti unda e persona R. tabata sinta, tin un tas color preto. Polis a puntre di ken e tas ey ta, y R. a declara mesora cu esey ta di dje. Polis a tuma e tas, a habri esaki, y den dje a bin haya un saco transparente conteniendo marihuana, mas placa cash hunto cu e marihuana. Tambe a haya un saco conteniendo puiro di cocaina.
Tur droga a wordo confisca. E sospechosonan R., L., y G. a wordo deteni pasobra a gara nan ta violando Articulo 3 y Articulo 4 di Ley di Droga. Nan a wordo hiba cu Vehiculo di Transporte, unda Fiscal Auxiliar a duna ordo pa nan keda cera pa mas investigacion.
Aki a pone Unit Narcotica di Cuerpo Policial na altura, cu lo sigui cu e investigacion.
