Polis ta pidi comunidad pa yuda cu informacion
- E tabata lora den paña y dera den santo
ORANJESTAD (AAN): Tabata Diadomingo dia 10 di Maart 2024, ora cu banda di 1:05 pm, Central di Polis a ricibi yamada di ciudadano kende a splica cu na un rancho na costa nort di Aruba, a haya algo cu ta parce un feto humano. Esey ta un baby cu tabata den barica di mama y kizas a nace morto.
E prome informe cu central di polis ta haya ta cu segun e personanan e ta mustra di ta trata un animal morto y e tabata dera den santo pero nan no ta sigur.
Central di polis ta despacha un unidad di Polis na e Rancho conoci na “Piedra Cora” situa banda di caminda poco prome cu yega Natural Bridge.
E prome unidad di Polis cu a yega na e lugar menciona, a baha pa check y a confirma cu di berdad ta trata di un feto morto, y e ta lora den paña. Esey ta indicativo cu no ta animal.
Esey a pone cu a dirigi e ekipo forensico di BFTO na e lugar, y nan a confirma cu ta trata di un feto humano y no un feto di animal. Mesora a pone demas autoridad na altura.
E mesun dia pa 2:30 pm, Fiscal a laga tuma e feto pa investigacion. Riba Dialuna, esta 11 Maart 2024 Dr. Texier a haci autopsia riba e feto y a constata cu ta trata di un feto masculino di mas o menos cinco pa seis luna den desaroyo y cu ta trata di un caso cu lo mester a pasa sea un of dos dia prome cu 10 maart 2024.
Abo conoce un dama cu tabatin un barica, y desde dos siman pasa diripiente no tin e barica mas? Si tin cualkier persona cu sa algo di e caso y si tin cualkier persona cu por a mira algo, por yama departamento di Jeugd- en Zedenpolitie (J.Z.P.) na 281-3180 of por yama Tipline di polis na number 11141 si bo persona ta desea di keda anonimo.
