Accident na Bakval di Diasabra marduga
ORANJESTAD (AAN): “Nos ta lamenta e sucedido di awe madruga pa loke a pasa e colega como tambe e otro coleganan cu tabata na e lugar,” ta loke Altocomisario Ramon Arnhem a declara, relaciona cu loke a socede Diasabra marduga na Bakval den distrito di Noord. “E caso aki ta worde tuma na serio.”
E ta referi na un accident cu a keda registra, y ora cu Polis a yega a bin nota cu ta un di e Hefenan di Polis cu ta bao influencia tras di stuur, a dal y kibra e Dienstwagen cu e ta coriendo cune.
Polisnan a laga e Sub-Inspector haci test di supla, y ora cu el a supla riba e aparato di Alco Sensor IV, esaki a produci un resultado basta malo pe.
E tabata coriendo e Dienstwagen y debi na su estado di buracheria, a baha di caminda y dal fuertemente contra un auto staciona dilanti un cas.
Altocomisario a tuma decision pa suspende e Sub-Inspector aki.
“Como polis nos ta mester duna un bon ehempel pa e comunidad. Vooral den funcionan cu ta rekeri esaki. Nos ta compronde tambe e sentimiento y emocion rond di e sucedido aki. Nos lo actua transparente y consecuente.”
Riba e potret por mira Altocomisario Ramon Arnhem, kende a finalisa bisando: “Mando policial a tuma medidanan interno pa cu e colega envolvi den e caso aki. Den colaboracion cu Ministerio Publico a cuminsa un investigacion.”
