Minister di Husticia Rocco Tjon ta duna di conoce:
ORANJESTAD (AAN) – Den un entrevista cu DIARIO, Minister Rocco Tjon, den su calidad di minister di husticia, a reitera cu e ta sinti su mes hopi orguyoso cu e cifranan di criminalidad a baha, ya cu apesar di tur e retonan cu KPA tin, nan ta sigui dedica, bringa servicio y garantiza seguridad.
Encuanto e aspecto di personal specificamente, e dignatario a duna di conoce cu e tin un proyecto bunita na caminda. E mandatario a duna di conoce cu na inicio di October proximo tin un klas nobo ta bay cuminza, cu loke ta bay alivia e falta di personal cu tin den Cuerpo Policial, y otro aña, den presupuesto 2024 lo presupuesta un fondo special, lo percura pa diferente klas di Polis cuminza.
Pues, a corto plazo, aworaki por ta sigur cu for di awo te e prome cuartal di 2024, lo tin por lo menos di 50 pa 55 polis lo bay reforza KPA. Minister Rocco Tjon a agrega cu pa e temporada di carnaval 2024 e ta sigur cu lo no mester busca polis di Sint Maarten pa reforza KPA, pero cu nan mes lo por carga esaki, segun con Alto Mando lo traha e 'draaiboek'. E sistema di camara a yuda KPA hopi durante Carnaval 2023, e mandatario a indica.
