Polis a atende tiramento durante Jouvert Morning y detene 3 hende y haya arma di candela

Jouvert Morning a produci 20 detencion

ORANJESTAD (AAN): E parada di Jouvert Morning pa Carnaval 71, a start exactamente 4:03 am.  E momento ey lidernan di Fundacion SMAC conhuntamente cu Cuerpo Policial Aruba a haci inicio Jouvert Morning 2025.

   E aña aki a uza un ruta diferente cu a cuminsa y caba na Aruba Carnival & Entertainment Village.

   Liliana Rasmijn di Cuerpo Policial, a splica cu e biaha aki autoridad Policial a conta cu 160 personal riba pia. Diferente departamento di Cuerpo Policial a traha hunto entre otro Mobiele Eenheid, Flex Team, Polis Uniforma, Departamento di Recherche, Personal administrativo, departamento di trafico y planologie, AE, K9 Unit, Mobiel Commando y OCC como tambe personal di CEA.

   Pa 8:49 di mainta e cabez di e parada a yega bek na Aruba Carnival & Entertainment Village y pa 9:25 am e rabo di e parada di Jouvert  a yega su final.

   Cos no a bay trankilo.  E aña aki tabata tin un total 20 detencion di cual Departamento di Recherche a sigui cu e caso pa mas investigacion.

   Polis a bisa cu e detencionnan tabata basa riba delitonan di e.o. droga, arma blanco (sker, cuchiu, bat, machete) bringamento, buracheria y arma di candela.

   Durante parada di Jouvert den caya Monseigneur Verrietstraat (cu ta keda pazuid di Julio’s Bar) a nota cu gang lo a tira otro cu arma di candela y na unda 3 di e sospechosonan a  core bay direccion di Aruba Carnival & Entertainment Village na unda cu personal di K-9 a topa cu ne y a detene 3 sospechoso.  Ora di listra e compaynan aki, a haya e arma di candela y a confisca esaki.

   A pasa e sospechosonan pa departamento di Recherche pa mas investigacion.

   Parce cu violencia no a stop eynan, pasobra poco prome cu 11’or mainta a drenta un melding na unda tin bringamento cu machete y bat y na Weg Rooi Hundo. Polis uniforma y Mobiele Eenheid a presenta na unda a detene 5 sospecho. E sospechosonan a wordo pasa pa departamento di Recherche.

   Pues den 2025 tabatin 20 detencion.  Tirando bista atras, na aña 2024 tabata tin 21 detencion.