Autoridad policial ta prepara pa e paradanan di carnaval cu falta

Liliana Rasmijn, Vocero di Polis:

*Faya bo haya ta na vigor y Mobile Comando ta in place 

ORANJESTAD (AAN) – Liliana Rasmijn, Vocero di Cuerpo Policial, den entrevista cu DIARIO a declara cu pa loke ta e parti di e paradanan tras di lomba, a cuminza cu dos parada cu cero detencion.

Rasmijn a indica cu Sunset tambe a bay bon, pasobra tampoco tabatin detencion, y e ta varia entre aña pasa y e aña aki cu un of dos detencion mas hopi.

            Rasmijn a señala cu si wak e bon, pa polis toch, mirando con e simannan di carnaval ta, di nan banda e ta bayendo bon. E parti di control di trafico, pa loke ta maneha bao influencia, tambe nan ta wak, y ta haya feed back di e polisnan cu ta haci control, y tambe nan ta bisa cu mayoria auto tin nan “amigo responsable” pues, por mira tiki, tiki, cu e mensahe ta yega.

            “Si bo ta wak e all in all, e ta un bon carnaval te cu awe” Liliana Rasmijn a expresa.

Ademas di e paradanan di Diabierna, awe tin Lighting Parade, Diadomingo tin e ultimo carnaval di nos muchanan, y si sigui bay tin e “masquerade Parade”, e parada di luz na San Nicolas, e paradanan grandi, pues alomenos seis pa siete actividad cu falta y Cuerpo Policial ta cla p’e, vocero di Polis Liliana Rasmijn a menciona.

            El a agrega cu KPA ta sinta tur siman cu SMAC y nan ta evalua kico a bay bon y menos bon di e actividad cu a pasa, kico por drecha y cu miras na e siguiente paradanan tambe.

            “Di parti di nos, nos ta cla pa e ultimo dos weekendnan aki”, Liliana Rasmijn a subraya.

Ademas no mester lubida cu KPA ta conta cu tecnologia di camara pa haci control. Esaki ta pa reforza e control riba caya y polis ta haci hopi enfasis den esey.

            “E aña aki nos tin e parti di Savaneta ‘OCC’, na unda cu eynan tin bista completamente. Tur camara riba Aruba ta conecta eynan, unda cu nos tin nos mobile Comando tambe, cu tin e camaranan strategicamente riba e ruta, pero tambe nos tin drone aworaki, unda nos ta lanta e drone y por wak e ruta, wak kico ta pasando y unda cu aworaki e drone tambe tin e parti di infrared. Kiermen, ora ta scur, tin biaha bo ta detecta ora e persona ta move. Kiermen, tiki tiki nos ta bayendo unda cu nos kier. “Nos Halto Comisario a kere hopi di e parti di tecnologia, y den sigui avanza na unda cu bo ta wak cu esaki ta duna su frutonan. Kiermen, un tremendo parti di nos Mobile Comando y nos ta keda propagand’e tambe. Den e fin di siman aki, den cada actividad bo lo wak e auto tambe. Faya bo haya ta na vigor, Mobile Comando ta in place, y si bo tin pa busca problema bo sa cu na un manera of otro, polis ta yega na bo”, Liliana Rasmijn a vocifera.