Pickup a ranca palo di luz riba Avenida Nelson Oduber

Chauffeur a resulta herida

ORANJSTAD (AAN): Tabata Dialuna marduga, un poco despues di mey anochi cu yamadanan a cuminza drenta na Central di Polis cu un accident basta pisa a caba di socede riba Avenida Nelson Oduber, riba e via di Bubali pa Palm Beach, y cu tin hende herida.

   Mesora a dirigi Polisnan di Noord, y tambe a avisa Centro di Alarma pa dispacha Ambulans na e lugar.

   E prome unidad di Polis cu a yega, a bin nota cu ta un Toyota Hilux Extended Cab color cora a kibra riba un palo di luz, cu a dobla den dos y cay abao.

   Agentenan a nota cu un palo di luz cu ta como 40 meter prome cu esey mas pazuid tambe ta mustra di tin daño.  Nan ta bay investiga kico lo a socede, cu e chauffeur di e vehiculo a baha caminda na su man drechi, lo a ‘touch’ e prome palo di luz, sigui core mitar riba acera bay nort y finalmente pega riba e otro palo di luz.  Finalmente ta e Polis di Trafico lo bay pone tur cos den rapport pa splica e accident.

   E chauffeur a resulta herida y tabatin mester di asistencia medico, unda cu na yegada di Ambulance el a wordo controla door di Paramediconan y nan a dicidi cu e caso aki tin di wordo atendi na Hospital.

   Polis di trafico tambe tabata necesario na e sitio y tambe personal di NV Elmar pa check e stabilidad di e palo di luz cu a keda dobla.