Banda di su Suzuki Swift
ORANJESTAD (AAN): Dialuna mainta hopi trempan, habitantenan di Caya Frere Tarcicius a bati alarma, pa indica cu net na entrada di e ex centro di actividad y fiesta di antes ‘Villa Nostra’ na Paradijs, tin un persona abao den un posicion straño banda di su auto.
Polisnan cu a yega mesora y na e T-weg di Caya Frere Tarcicius y Caya Frere Stanislas por a mira cu e persona masculino no tabata duna señal di bida. Di e manera aki a notifica esnan concerni.
Ta trata di un persona masculino, banda di un Suzuki Swift color blauw. Di leu por a mira parcialmente un curpa, den e porta di auto habri.
Docter Texier ta esun cu a yega pa constata morto di e persona, cu no ta biba mucho leu. Un ruman muhe tambe a yega na e lugar y por a mira docter a bay papia cu ne y haci'e algun pregunta.
Team Forensico di BFTO tambe a presenta, pa haci nan investigacion.
Na famianan di e fayecido, DIARIO ta extende su mas profundo palabra di condolencia.
