Mericano a bira malo den lama na Boca Catalina y fayece

ORANJESTAD (AAN): Diasabra mainta poco prome cu 12’or, hendenan a nota cu un persona masculino di habla ingles a bira malo riba lama banda di Boca Catalina. 

Esnan abordo di un Catamaran eybanda a usa un boto chikito di nan, pa asina yuda transporta e victima pa oriya di lama, y bati alarma.

   Tabata net 11:42 am cu Central di Polis ta worde notifica cu un persona a bira malo den lama na altura di Tres Trapi y cu e no ta dunando señal di bida.

   Central di Polis a manda mesora unidadnan di Polis di Noord y Strandpolitie, y a pone Centro di Alarma na altura pa nan manda Ambulans cu maximo urgencia pa e area.   Un unidad di Cuerpo di Bombero tambe a yega pa si acaso nan asistencia ta necesario.

   E prome unidad di Polis cu a yega, a topa cu un grupo di persona na beach ta tratando di practica CPR riba e persona masculino.  Na yegada di Ambulans, e paramediconan a sigui cu CPR y a pone e machine pa detecta batimento di curason. Pero aki a bin nota cu e no ta duna señal vital mas, y nan no por haci nada mas pe.

   E ora pone un laken riba su curpa, y a pidi Centro di Alarma pa manda un Docter pa e lugar.  Pa 1:00 am, Dr. Texier a constata morto di e turista masculino I.I. di 71 aña di nacionalidad Mericano.  E ta doño di un cas riba tereno di Tierra del Sol.

   Na famia di e fayecido, DIARIO y Cuerpo Policial ta manda palabra di condolencia.