Persona cara tapa riba Scooter a los varios tiro na De Vuyst

Polis a confisca e Scooter y a haya e arma

ORANJESTAD (AAN): Tabata Diadomingo anochi alrededor di 8:35 pm, cu yamadanan a cuminza drenta na Central di Polis, pa indica cu hendenan a cu a scucha un of mas tiro den De Vuyst na San Nicolas.

   Central di Polis mesora a dirigi diferente unidad di San Nicolas pa e area aki.

   Mesora polisnan di San Nicolas a  move bay den e direccion.  Moviendo rond, un patruya di Polis a topa cu un Scooter color preto, cu un manehador cu cara tapa riba dje coriendo rumbo area di De Vuyst, na altura di Lago Heights Foodcenter den Juwana Mortostraat.  E Scooter aki no tin plachi di number, y tampoco luz cendi.

   Ora cu e manehador a mira e patruya, el a desvia y inmediatamente a trata na core pa polis. Polis a dune varios señal pa stop, pero e no tabata sigui e ordo.  Polis a sigui su tras y tabata yegando cerca di dje, como cu e Scooter no tin hopi potencia. Despues banda di Mount Scenerystraat cerca di e cruzada cu Ronde Klipweg, , e manehador a drenta un caminda di santo unda el a perde control dal abao y core drenta mondi na pia.

   Luna tabata basta cla y ora cu Polis a bay su tras na pia y na dado momento nan ta wak e ta zwaai algo den mondi. Nan a bay check y ta un arma di candela. Pero, lamentablemente Polis a perde e sospechoso for di bista.

   A laga e arma benta eybao, y a core pidi team Forensico di BFTO pa yega eynan.  Varios unidad di Polis di Santa Cruz, Polis di Trafico, K9 Unit, y Flex Team a bin duna yudansa. Nan ta esnan cu a recoge e arma di eybao pa asina warda tur vingerprint intacto.  Tambe nan a check e Scooter pa vingerprints.

   Asina tanto e Scooter como e arma di candela a wordo confisca.  Un cos ta basta sigur, ta cu arma di candela ta mustra di ta masha facil mes pa haya aki na Aruba, y no cos di awor.

   Recherche tin e caso bao investigacion.  Polis tin confiansa cu nan lo pone man riba e sospechoso den e dianan venidero.