Mester atencion urgente pa falta di iluminacion na Wardanan di Polis

Segun President di SPA, Lito Laclé:

ORANJESTAD (AAN): Siguridad di personal policial mester ta prioridad, y un Warda di Polis sin suficiente iluminacion ta representa un riesgo pa esnan cu ta traha aden. Asina President di Sindicato di Polis (SPA), Lito Laclé, a expresa, señalando cu falta di luz durante oranan di anochi y madruga ta limita visibilidad y ta compromete siguridad di su coleganan.

   Laclé a splica cu ora un polis ta sali pa bay den patroya, e mester por observa e area rond di e warda y identifica si tin hende scondi pafo. Segun e dirigente sindical, falta di visibilidad ta crea un situacion inaceptabel pa personal policial.

   SPA a dirigi preguntanan na Mando Policial pa haya claridad tocante e procedura necesario pa garantisa suficiente iluminacion na tur Warda di Polis. Entre otro, e sindicato kier sa si ta necesario pa haya autorisacion di Minister di Husticia pa bestel y instala e luznan, y kico mester sosode pa atende e situacion mas pronto posibel.

  “Awe nos ta para pa siguridad di nos coleganan, ya cu tin tanto criminalidad, tiramento y problemanan mental”, Laclé a expresa.

  E President di SPA a indica cu e sindicato ta acudi na prensa pa trece e condicionnan di trabao di personal policial na atencion di comunidad. Segun e, hopi biaha ta despues cu e problemanan wordo haci publico cu ta bin accion pa resolve nan.

   “No tin nada otro pa nos haci aworaki, cu bin prensa y mustra pueblo di Aruba kico nos ta pasando aden. Nos no ta trahando den un paraiso bon aworaki pero den un paraiso unda colebra ta pica nos di tur banda”, el a declara.

   Laclé a conclui indicando cu SPA a combersa cu e departamento di bedrijfsvoering, cu ta encarga cu e asunto. Sin embargo, segun el a splica, e departamento tambe ta limita den su posibilidadnan di actua, ya cu e ta pendiente di autorisacion pa e financiamento necesario pa reemplasa of instala luznan nobo na wardanan di polis cu falta iluminacion.