Persecusion riba caminda a finalisa den aresto di motociclista

ORANJESTAD (AAN): Tabata Diadomingo marduga, cu un patruya di Polis a mira un motorcycle tipo Dirt Bike

conoci tambe como ‘Scrambler’ ta coriendo den area di Eagle.  Agentenan a duna e manehador un señal pa stop pa check si tur cos riba e Scrambler ta cuadra cu regla.

   Sinembargo e manehador mesora a primi trot, y no a preocupa cu e señal di Polis.  Di e forma ey e patruya mesora a start un persecusion, y via di Tetra-Radio a solicita yudansa den e persecusion.  Asina cada rato tabata duna informacion unda nan ta.

   Nan a keda core rond den e area, y cada rato ora cu Polisnan tabata a punto di gar’e, e manehador tabata burla di autoridad y a logra sigui core.  Polisnan motoriza tambe a uni cu e persecusion, y nan si tabata keda basta cerca tras di e persona.

   E persecusion a sigui riba Avenida Nelson Oduber tambe y ora el a yega na e rotonde grandi banda di Eagle Bowling Palace, el a tuma e caminda cu ta bay direccion Eagle Beach.  Aki ta unda cu algun meter pariba di e construccion nobo di Iberostar Grand Resort cu nan a logra stop e Scrambler aki di marca Kawasaki, color berde.

   Mesora e manehador a wordo aresta, y hiba Warda di Polis cu Vehiculo di Transporte.  Riba e motorcycle no tin ningun plach'i number, y sigur nada di documento necesario.