Diabierna atardi tabatin racha di violencia na Dakota y Tarabana

Un persona interna den Cuido Intensivo

ORANJESTAD (AAN): Diabierna atardi pasa di 5:30 pm, Central di Polis a bolbe dirigi unidadnan di Polis di Playa pa otro dolor di cabez na un cas na Mandolinstraat den Tarabana, caminda un hende a wordo hinca.

   Mientras cu unidadnan di Polis ta bayendo pa e lugar di e incidente, un rato despues ta drenta un melding cu tin homber cu a worde hinca tambe na Olijfistraat na Dakota.

   Mirando cu violencia ta birando serio den e oranan di atardi aki, Central di Polis a dirigi mas unidad di Polis debi cu e situacion a bira tenso y ta drenta melding di otro persona hinca den Pindastraat.

   E unidad di Polis cu a yega den Mandolinstraat, a bin topa cu un persona herida, y e agentenan a nota cu e situacion di e victima a cuminsa empeora, y su señalnan vital ta birando debil.  Polisnan aki a dicidi cu nan mes tin di bay hibe lo mas urgente posibel pa Hospital, y cu yudansa di mas unidad Policial riba caya, a escolta e patruya pa por habri caminda pa hibe Hospital.  Esaki debi na e hecho cu e horario ey ta conoci como ‘rush hour’ di trafico na Aruba.

   Recherche di Playa a presenta eynan, y e ekipo forensico di BFTO tambe a yega pa haci un investigacion.  Nan investigacion a centralisa na Mandolinstraat y tambe na Cashustraat, cu ta keda net banda di Olijfistraat.

   Den oranan tempran caba tabata tin problema andando na unda cu 2 hoben mester a worde herida cu machete.  Tur esaki parce ta di ta liga cu otro, y cu awor uno ta tumando venganza contra e otro.

   Den fin di siman a haya sa cu un di e victimanan ta den Unidad di Cuido Intensivo, y 3 otro victima ta stabil.

   Den un otro relato por lesa loke a socede cu un bululu pafo di Servicio di Emergencia na Hospital tambe.

   Cuerpo Policial ta haci un suplica na personanan cu sa algo of a mira algo pa yama e Tipline di Polis cu ta 111-41.