Persecusion di Suzuki a resulta den detencion di dos persona den posesion di arma di candela

ORANJESTAD (AAN):  Tabata Diaranson den atardi, Polis a bay atende un caso na  Schotlandstraat. Nan a bay eynan pa controla un Suzuki Swift den loke inicialmente tabata un control rutinario.

   Sinembargo, ora cu polis a indica e chauffeur pa para e auto, e ordo no a wordo sigui, pero si a dicidi di subi velocidad.  E ora ey, a start un persecusion cu a termina un poco mas pariba den Ierlandstraat, cu ta e adres unda e auto ta aparece registra.

   Eynan, agentenan a atende cu 4 hoben cu tabata den e auto. Dos di nan a baha core hopi duro. Polisnan mes no a haya chance di gara nan. E otro dosnan si a wordo deteni na e auto.

   Tur e drama aki a resulta den e hecho cu  nan tabata tin algo di sconde pa autoridad. Den e auto a bin topa cu un cuchio. Pa colmo, di esnan den e auto lo a core y benta algo afo cu a resulta di ta un arma di candela.

   E agentenan cu a atende e caso a avisa e departamentonan concerni, manera e departamento tecnico y tambe recherche pa asina por bay investiga mas profundo kico lo por tabata e intencion pa cu e posesion di e armanan aki.