Tin recall rond mundo pa ‘peligro di candela’ di e autonan aki
- Dama y su yiu chikito a sali na tempo di auto
ORANJESTAD (AAN): Diamars anochi banda di 7:20 pm, un unidad di Polis di Noord a ser manda den area di costa cerca di Faro di California, como cu lo tin un auto na candela.
Ora cu Polis a yega eynan, a bin topa cu enberdad un auto na candela como 1 kilometer Noordwest di Faro banda di costa. Den e area tabatin un señora y su yiu ta yorando.
E señora a splica cu e tabata chauffeur di e auto cu ta na candela. El a bisa cu nan a bin un rato banda di costa pa asina tira bista na e luna bunita den cielo. Pero na caminda diripiente nan a sinti holor di plastic ta smelt. Dado momento e señora a dicidi na baha di e auto, y a baha su yiu tambe.
Segun e señora na momento cu el a baha di su auto y a bay controla banda dilanti di e auto, el a mira vlam di candela ta cuminsa sali for di e headlamp banda robez. Den un rato di tempo, candela a cuminsa sali tur caminda.
Polis a tuma nota cu ta trata di un hatchback Hyundai Accent color creme. Bomberonan tambe a yega, pero na prome instante a bay lugar robes. Nan a subi e sero bay te na Faro di California banda di Faro Blanco Restaurant y mira cu tin nada eyriba. Despues nan mes a nota di halto, cu e candela ta mas na costa. Pero ora cu a yega, ya no por a haci mucho cos mas pa salba e auto como e tabata full na candela. Esaki ta un total loss sigur.
Esaki a bira e di dos Hyundai Accent cu a kima den menos di 1 siman riba e isla. Diasabra marduga caba un otro Hyundai Accent hatchback a kima full staciona pafo dilanti un cas na Caya Strea, na Tarabana Residence.
Y esaki ta pasando, apenas 2 luna despues cu e fabricante Hyundai a emiti recall pa caso similar.
Enberad, tabata dia 27 di September 2023, e compania Hyundai a adverti consumidornan rond mundo cu tin chens cu bo Hyundai Accent modelonan di aña 2012 te cu 2015 por cende candela inespera, sea e auto ta den careda of e ta djis staciona sin hende aden.
E advertencia di Hyundai y tambe National Highway Traffic Safety Administration a bin despues di un serie frecuente di Hyundai Accent na candela, como tambe demas modelonan di Hyundai manera Hyundai Elantra, y Hyundai Genesis coupe. Pero e ta afectando modelonan KIA Sorento, y tambe Kia Soul.
Pesey Hyundai y tambe KIA a pidi doñonan di Hyundai Accent, pa evita di staciona paden di garashi of otro structura, debi cu e auto inespera y diripiente por pega candela.
Esaki ta debi cu e auto por desaroya un lek di liquido interno den e modulo di anti-lock brake. Esaki por resulta den un corto circuito cu ta pone keinta demasiado, y finalmente start un candela.
Hyundai y KIA na Merca a emiti un recall pa como 3.3 miyon di e vehiculonan aki, pa asina bay haci reparacion y drecha e problema.
