ORANJESTAD (AAN): Diasabra mainta trempan, un unidad di Polis di San Nicolas a ser manda den area di Sabana Basora Noord,
como cu hendenan den un Nissan March color preto a caba di los tiro riba un persona.
Relaciona cu e informe aki, e unidad di Polis a mobiliza rapidamente pa e area, y un otro unidad mas tambe a bay duna yudanza pasobra e por ta un situacion peligroso.
Polis a yega na un adres y a papia cu e victima. El a bisa cu mainta trempan ey e tabata pafo di su cas pa asina drecha su vehiculo. E mainta ey solo a sali pa 6:23 am na Aruba.
Diripiente el a sinti cu un auto ta pasando banda di su cas. El a bira cara y a nota cu ta trata di un Nissan March preto. Ora cu e auto ey a pasa banda di dje, un homber den e auto a mik un arma di candela den su direccion y a los tiro tambe, y despues a sigui core. E victima a duna number di auto A-22474 y demas descripcion di e vehiculo.
Persecusion a cuminza: Net ora cu Polis ta papiando cu e victima, e otro patruya di Polis a bin topa un Nissan March coriendo dilanti un cas na Sabana Basora. E number di auto ta cuadra cu e denuncia.
Polis mesora a bira y bay tras di e Nissan March. E unidad a cende nan zwaailicht y sirena y a duna ordo na e chauffeur pa e stop. Pero e chauffeur no a cumpli cu e ordo aki, y a djis primi trot tratando na aleha.
E chauffeur a aumenta su velocidad y a cuminza core masha roekeloos, y zig zag riba caminda. Polis a bay su tras, y sigui core door di cayanan di Pos Chikito, Sabana Basora, y Sabana Basora Noord.
Autoridad a nota cu den e Nissan March tin dos persona. Durante e persecusion, Polisnan a keda duna ordo via loudspeaker pa e stop.
Auto a pega riba veld: Na altura di e veld di futbol di Unistars, e Nissan March a pasa riba un pida acera di santo, y a subi e veld di Futbol. Pero como cu no ta trata aki di un vehiculo SUV, un simple auto compacto, e parti abao di e motor a haya basta golpi, y e vehiculo a stop di core.
Aki ta unda cu e dos porta dilanti a dal habri y e dos sospechosonan a sali na pia y a cuminza core bay zuid.
E homber cu a sali for di e porta banda drechi ta di color di cuero blanco, lomba sunu y bisti cu jeans blauw. E tabatin un shirt blanco riba su cabez pa tapa esaki un tiki.
E homber cu a sali for di porta banda drechi, tabata color scur, cu un bodyshirt blanco, cu short blanco y preto, y un petchi blanco riba cabez. E dos delincuentenan aki a kea core.
Polis tambe a bay na careda nan tras. Y nan a nota con tur dos persona a core bay na un adres na Pos Chikito. E sospechoso lomba sunu a bula riba e muraya di cura, y a keda core bay direccion zuid.
E sospechoso den bodyshirt sinembargo a yega na e cura, y e no por a bula. E ora el a keda core bay direccion pariba pasa mey-mey di algun yerba.
Ora cu a bay check riba cura di e cas, Polis a bin topa cu e homber lomba sunu, scondi mescos cu un mucha chikito tras di un boter di gas. Polis a pone hands-up y a dune ordo pa drumi riba su lomba. E sospechoso a cumpli cu e ordo. Asina a detene e homber como cu el a viola Articulo 2:262, hunto cu Articulo 1:119, y tambe Articulo 2:259 di Codigo Penal di Aruba, y tambe di a viola Articulo 3 di Ley di Arma.
Net e momento ey, Polis a mira un señora para pafo di un cas na Pos Chikito, y el a haci señal na autoridad cu un homber sospechoso a drenta su cura di cas. Ora cu Polis a core bay check, nan a mira con e sospechoso ta tratando envano di bula e cura di cas. Polis a grita e homber pa e stop y drumi abao. Pero e sospechoso color scur cu bodyshirt blanco a core bay zuid y aki a yega na un muraya di un otro cas, y a bula esaki.
Ora cu e sospechoso a trata di bula un otro cura, Polis a yega cerca y a gare, y bente abao y pone drumi e ora ey si pa asina por boei su mannan.
E homber aki tambe a wordo deteni pasobra a viola Articulo 2:262, hunto cu Articulo 1:119, y tambe Articulo 2:259 di Codigo Penal di Aruba, y tambe di a viola Articulo 3 di Ley di Arma.
Nan a wordo hiba na Warda di Polis, unda cu Fiscal Auxiliar a duna ordo pa nan wordo encarcela inmediatamente por lo pronto. Pues awor e dos hombernan “vuurwapen gevaarlijk” aki tin di bay responde na Husticia di e intento di asesinato un rato prome riba un persona na su cas. E arma di candela tambe a wordo confisca.
Un investigacion a cuminza na e cas unda e tiramento a socede, pa asina haya tur evidencia. Di e forma aki Ministerio Publico por crea un caso solido contra e dos individuonan aki.
Lo bay haci un trabao forensico riba e arma di candela aki, pa asina purba na match esaki cu cualkier otro caso di tiramento cu a socede recien of den pasado y cu nunca a wordo soluciona. Di e forma ey lo por haya sa den kico e hendenan aki ta meti.
Autoridad a keda sorprendi cu e homber den bodyshirt, aunke e tin un curpa di ta un hende cu ta bay gym, toch no por a ni bula un cura drechi. Kizas e ta bao influencia di un of otro substancia y pesey no tin forza pa bula un simple cura di cas.
Finalmente, sigur esaki ta un bon trabao di Polis pa gara e sospechosonan aki. Aruba kizas ta un tiki mas safe awor.
