Mas cu 400 kilo di droga rumbo pa Aruba a wordo intercepta

ORANJESTAD (AAN):  Diabierna marduga, rond di 04:00 Wardacosta a detecta movecion sospechoso di un boto riba lama cu tabata rumbo pa Aruba.

            Mesora a dirigi e Metal Shark di Aruba riba e boto. Hunto cu Metal Shark, helicopter di wardacosta tambe a sali pa asisti. Despues di un persecucion extenso, y tironan di advertencia, Metal Shark a logra intercepta e boto.

            Abordo tabatin 5 homber di cual 2 ta nacionalidad Venezolano, 2 Dominicano y un Colombiano. Riba e boto tabatin diferente bulto di droga cual despues di investigacion a resulta di ta pisa mas o menos 400 kilo.

            E droga a wordo confisca y e 5 personanan a wordo deteni y traslada pa departamento di Crimen Organiza pendiente di mas investigacion. E droga a wordo destrui.