Pelea entre homber y dama a finalisa den golpi severo y posibel brasa fractura

ORANJESTAD (AAN): Dialuna atardi algo pasa di 4:00 pm, Polis a ser manda cu urgencia net dilanti un negoshi di Huña y Pedicure na Tanki Flip 28,

cu ta situa riba caminda grandi di Tanki Leendert pa Hato, net otro banda di Radio Bo Guia FM.   Central di Polis a ricibi varios yamada cu tin un pelea fuerte andando e momento ey.

   Polisnan a mobilisa mesora, y ora cu a yega dilanti e negoshi di haci huña y pedicure, a haya un dama abao sinta riba e stupi chikito abao net na entrada di ‘D Karol Beauty Salon’.  Nan a mira cu e dama tabata herida, y ta keha di basta dolor.  Un señora a yega cerca pa cuminsa asisti e dama herida, y a hasta pone serbete blanco rond di su nek pa duna alivio.

   Mesora Polis a atende e dama, y a pidi pa Ambulance.  Otro Polis a cuminsa averigua kico a pasa y a resulta cu e homber cu a comete e maltrato serio aki, y ainda e agresor ta na e lugar.

  Ambulance di ImSan a mobiliza cu rapidez pa e lugar, y e Paramediconan mesora a bay na e dama cu tabata sinta riba e pida stupi.  Nan a nota cu e forma cu su brasa ta, no ta den forma ‘natural’, y basa riba esaki y demas trauma na su curpa, nan a dicidi mesora cu tin di transporta e dama cu urgencia pa Servicio di Emergencia na Hospitaal, unda cu lo tin di mira con serio e brasa ta.  Posibilidad ta grandi cu el a fractura esaki, y pesey e dama ta den dolor inmenso.

   Mientras tanto Polis a boei e homber, y a pidi Vehiculo di Transporte pa bay cu ne Warda di Polis.  A mira cu e transportwagen di CEA a yega pa duna un man y hiba e homber warda di polis, unda e lo keda cera pendiente investigacion y si e dama no cambia su declaracion.  Kico e problema realmente ta, ta bay wordo investiga door di Recherche.