Dama a perde control y bolter cu auto na Rooi Afo

ORANJESTAD (AAN): Tabata Diamars marduga den careda di 1:00 am, cu unidad di Polis a bay cu urgencia riba caminda di Rooi Afo pa un accident pisa.

   Na yegada polisnan a constata cu ta trata di un auto sedan a bolter y bay termina den un cura di cas.

   Chauffeur di e auto Mazda 2 hatchback color preto, esta un dama a logra sali di e auto, y a bay sinta abao riba pida stupi den e cura di cas, pero tabata mustra basta confuso.  E vehiculo aparentemente tabata bin di panort cu velocidad basta halto, esey basa riba e rastronan riba caminda.

   Pa un of otro motibo a baha caminda na su man robes, y a faya di dal un palo di luz, a bolter y bay cay parcialmente den un cura cas spantando e habitantenan. E auto mes a keda cu tur cuatro wiel den halto.

   Mas cu claro e zonido duro a lanta algun persona rond cu a sali bin mira kico tabata pasando.

   Ambulance a yega na e lugar pa atende cu e dama, y e tabata cana cu yudansa, pa asina a drumi riba e cama, pa asina a hib'e Hospital pa un chekeo.

   E dama tabata tin suerte cu e no a dal contra e palo di luz, esey si lo no a termina bon.