Despues di dies dia hospitaliza el a fayece
- Michael Gerard Hector di 52 aña a perde su bida
ORANJESTAD (AAN): Tabata dos siman pasa, esta Diadomingo 8 Juni 2025 merdia pa mas o menos 12:20 pm a sosode un accidente basta pisa na altura di e highway dilanti H.C. Today Supermarket na Cura Cabai. Central di Polis a ricibi varios yamada di hendenan cu ta raporta cu auto a caba di dal un peaton.
Polis a yega, y a bin topa cu un Compact Crossover SUV tipo Kia Sonet color shinishi cu tabata riba e caminda bayendo direccion pabao.
Mesora Central di Polis a dirigi diferente patruya di San Nicolas pa e lugar di accident, incluyendo Departamento di Trafico. Na su turno, Centro di Alarma a dirigi unidad di Ambulance di ImSan pa e lugar.
A bin topa cu e peaton gravemente herida abao na suela, net cerca di e palo grandi di kwihi. Mesora Paramediconan a atende, door di check su señal vital, y stabiliza e curpa prome cu bay cu ne. Cu sumo urgencia a mobiliza pa Servicio di Emergencia na Dr. Horacio Oduber Hospital.
Polis a cera e pida caminda pa asina haci investigacion. Na Hospital el a wordo hospitaliza den cuido intensivo pa por sigui dune tratamento y mira con su curpa ta reacciona.
Pero diez dia despues, esta Diaranson dia 18 di Juni 2025 den oranan di marduga, despues di ta luchando pa su salud, Polis a ricibi e tristo noticia cu e peaton a fayece.
Den marduga Docter a constata morto di Michael Gerard Hector, naci riba 3 December 1972 na Aruba, pues e tin 52 aña di edad.
E caso lamentabel aki ta bao investigacion pa Departamento di trafico. DIARIO y Cuerpo Policial Aruba ta manda palabranan di condolencia pa e famia di e victima.
