Homber di 42 aña ta deteni
ORANJESTAD (AAN): Vocero di Polis a confirma, cu tabata Diahuebs atardi cu personal di Aduana durante control na Aeropuerto Internacional Reina Beatrix a detene un hende homber cu droga den su maleta.
E sospechoso a wordo hiba na e departamento di Unit Narcotica y na nan turno a cuminsa cu e investigacion.
Vocero Policial Liliana Rasmijn a confirma na DIARIO, cu ta trata di e homber di inicial J.J.M. di 42 aña naci y biba na Curaçao. El a purba di pasa cu cocaina den su maleta.
Riba e potret aki por mira e paki di cocaina, lora tur cu duct tape shinishi, a marca un peso di 1,1 kilo.
Tanto e droga y e pasahero a wordo pasa pa Unit Narcotica y tambe seccion di Crimen organiza pa sigui cu e investigacion. E detencion aki lo tin chens pa desemboca den un of mas detencion den dianan venidero.
Cuerpo Policial ta haci un suplica na cualkier persona cu sa algo of a wak algo pa yama e tiplijn di polis cu ta 111-41. Corda cu bo ta keda anonimo.
