Liliana Rasmijn, vocero policial ta enfatiza:
ORANJESTAD (AAN) -- Encuanto e hobennan cu ta participa den gruponan di carnaval, Liliana Rasmijn a comenta den entrevista cu DIARIO, cu ta keda na e lidernan di grupo pa ta responsabel, pasobra e ‘banchi’ ta bin di nan. Esaki relaciona cu prome tabata tin dos banchi y e biaha aki hopi hende a ripara cu no tabata e caso y a puntra e vocero policial tocante esaki.
El a enfatiza cu e 'group leadernan' ta responsabel ma no ta tarea di polis pa controla esaki. “Pero mayornan tambe, ora bo yiu ta yega cas, bo mester por wak cu bo yiu ta bao influencia. Bo mester a wak e yega cas.
“Kiermen, hopi biaha nan ta cuestiona KPA. KPA no por un polis mara na cada persona. Abo tambe ta responsabel. Manera e campaña amigo responsabel ta bisa, ban sea mayornan responsabel tambe, ban wak unda nos hobennan ta, cu ken nan ta anda of si nan a bebe y papia cu nan”, Rasmijn a indica.
El a subraya cu KPA tey pa orden publico, y no pa controla si e hobennan cu ta den grupo ta uza banchi of no, y esey ta tarea di e 'group leadernan'.
KPA tey pa seguridad di cada persona tur caminda y si polis ta bay over na controla e hobennan e ora ey lo no tin suficiente polis tampoco. Ban stop di tira falta riba polis y cuminza cu sea mayor responsabel, sea e persona cu ta wak pa e muchanan.
“Group leadernan tambe, bin cu solucionnan y manera ta bisa cu prome tabata tin dos banchi, mester tin e control, pasobra controla banchi ta un y bistie ta otro. Esnan cu ta den bar, ban controla ken nan ta duna el alcohol tambe”, Liliana Rasmijn, Vocero Policial a señala.
