Un homber local di 24 aña ta deteni
- Confisca Marihuana, Ecstasy, LSD, y Cocaina
ORANJESTAD (AAN): Un investigacion cu autoridadnan hudicial di departamento anti-droga di Polis a bin ta haciendo, a produci suficiente informacion y detaye, pa asina Ministerio Publico a duna luz berde pa nan tene un razzia na un cas na Tanki Leendert.
Di e forma ey, Unit Narcotica a planea e razzia aki, y cu yudansa di Team di Aresto nan a yega di sorpresa na e cas.
Resultado di e razzia aki na e cas na Tanki Leendert, ta cu e oficialnan a hands-up y detene un homber di inicial F.F.A.T. di 24 aña naci na Aruba.
Ora di a listra den e cas, e oficialnan di Unit Narcotica a canta ‘bingo’, pasobra a bin haya un cantidad grandi di diferente droga eynan scondi. Ta comosifuera e lugar ta un tienda di droga, di tur sorto di tipo.
Vocero di Polis, Liliana Rasmijn a confirma cu e investigacion inicial ta rond di caso di droga. El a agrega cu durante listramento den dicho cas a confisca diferente tipo di droga; e.o. Marihuana, Ecstasy (XTC), LSD, y tambe Cocaina. E no a suministra e peso di e droga.
E homber a wordo hiba Warda di Polis unda el a ser presenta dilanti un Fiscal Auxiliar, kende a duna ordo pa e keda deteni pa mas investigacion.
Cuerpo Policial ta haci un suplica pa esnan cu sa algo of a wak algo di e caso aki na Tanki Leendert, pa yama e tipline di polis cu ta 111-41. Corda cu lo bo keda anonimo.
