Parti patras di un cas a kima den Korvetstraat na Madiki

Persona herida durante e candela

ORANJESTAD (AAN): Tabata Diamars mainta poco prome cu 11:50 am, cu Centro di Alarma ta informa Central di Polis, cu tin un cas na candela na Korvetstraat na Madiki.  E momentonan ey ya caba unidad di Bombero ta moviendo pa eynan.

   Bomberonan a yega eynan, y Polis tambe mesora a dicidi na cera e caminda di ambos banda pa asina duna e unidadnan di Brandweer un espacio completo pa haci trabao.  Nan tabata mira huma ta saliendo di un cas.

   Ora cu Bomberonan a baha y drenta e tereno, e ora nan a ripara cu e cas mes no ta na candela, sino un Bijbouw riba tereno cu tabata kimando.  A nota cu e candela ta cerca di 3 boter di gas, y tin chens pa e candela expande y pasa over pa cas di bisiña.

   Bomberonan a cuminza basha awa, y di e forma ey rapidamente a logra haya dominio riba e candela, y asina a stop e peligro di expansion.

   Diripiente a pidi Centro di Alarma pa manda Ambulance, como cu un ciudadano masculino kende tabata cerca, lo a inhala huma y no tabata sinti su mes bon.

   Paramediconan cu a presenta a controla e cabayero pero lo no a haya necesario bay cu ne Hospitaal.

   E cas principal mes riba e tereno, tambe a sufri daño di huma cu a penetra tur caminda.  Esey nifica cu tin di habri tur bentana pa holo sali bek, pues prome anochi nan lo no por drumi eynan.