Impacto fuerte den accident entre Motorcycle y Auto na Tanki Leendert

Dos persona a keda herida

ORANJESTAD (AAN): Tabata Diamars merdia alrededor di 1:30 pm, cu ciudadanonan na Tanki Leendert den cercania di sucursal di Digicel a tende sonido fuerte di impacto.

   Mesora Central di Polis a wordo yama, y a compronde cu un motorcycle a dal den un auto, y cu tin hende herida.  Polisnan a cuminza mobiliza, como tambe Ambulance.  Mas yamada tabata drenta indicando cu un persona den auto no por sali, y esaki a pone cu a manda Brandweer tambe eynan pa duna asistencia.

   Polis a yega y a bin topa cu e accident riba caminda di Kibaima pa Pos Abao, como 110 meter pabao di rotonde di Tanki Leendert.

   E impacto tabata entre un Motorcycle Suzuki cu a bay dal den banda robez di un auto compacto Hyundai Grand i10 color shinishi cu number A-38085.  A compronde cu e momento ey tin rij di auto bayendo poco-poco direccion pariba pa yega e Rotonde.  Aki un chauffeur a laga espacio pa e Hyundai Grandi i10 sali pa asina e tuma caminda bay pabao.  Pero net ora cu el a subi caminda pa bay pabao, e motorcycle Suzuki tabata pasando, y a bay dal den e auto.  Glasnan cu a kibra a laga algun herida riba su cara y tabata sangrando, y e curpa di e señora cu a dal contra e body di vehiculo, a lag’e herida.

   E motociclista hoben a dal duro tambe contra e body di auto, y posibelmente a fractura su schouder, y haya mas trauma na su curpa, y varios corta cu tabata sangrando.  Ora cu a bay check, e persona aki tin ningun clase di documento, ni aseguro, pa colmo ni nummerplaat riba e motorcycle.

   Dos ambulance tabata necesario y tambe Brandweer pa corta e porta di e auto pa saca e señora pa asina Paramediconan por atende cu ne.

  Polis di trafico a presenta pa atende cu e accidente y tambe a solicita pa takelwagen. Ambos herido a wordo hiba Hospital.