*A topa cu 3 persona ilegal tambe den e cas
ORANJESTAD(AAN): Diabierna mainta trempan e unidad di droga di Cuerpo Policial a drenta un cas na Catiri, relaciona cu traficacion y benta di droga.
Ora cu agentenan policial a haci un entrada hudicial na e cas, un homber y un muher a wordo deteni.
E homber ta S.E.K di 24 aña y naci na Aruba, mientras cu e muher ta N.M.A.D di 21 aña, naci na Venezuela.
Polis a tuma den beslag un cantidad di marihuana y bastante placa cash.
Tur cos ta indica cu probablemente for di e cas droga tabata wordo bendi, pero polis ta investigando e caso.
Durante e accion di polis a topa tambe cu tres persona ilegal den e cas y nan a wordo hiba pa Guarda Nos Costa.
Diferente departamento di polis a forma parti di e accion, incluyendo RRT, Flex Team, K-9 Unit, polis uniforma y BFTO.
