Cuerpo Policial
ORANJESTAD(AAN): E asina yama Atraco Team di Cuerpo Policial recientemente a haci un detencion na un cas na Moko.
Na e cas e sospechoso J. W.B. naci na Aruba a wordo deteni. Ta trata di un hoben di apenas 20 aña.
El wordo deteni relaciona cu un atraco cu a sosode den marduga di 22 di Juli den Jan Steenstraat na Sam Nicolas.
Segun e vocero di KPA, e victima di e atraco ta un muher di bida.
E informacion cu polis a haya for di dje ta cu na dado momento dos homber tabata sinta en auto y uno a baha bay cerca e muher di bida den su camber.
E persona aki a pone un cuchio na garganta di e muher y a logra coi placa for di e muher y a bay cune.
E muher a declara cu e sospechoso a bay cu 375 florin cu e tabata tin den e lugar unda cu e ta warda e placa cu e ta cobra su clientenan pa su servicionan.
E sospechoso ainda cu e muher bao di menasa, a pidie pa e bay pafo cune y na e momento ey e sospechoso a drenta e auto cu tabata pafo di e camber ta warda riba dje y huy for di e lugar.
Polis a wordo informa y e Atraco Team a wordo activa.
Despues cu e victima a entrega su denuncia na polis, e investigacion a cuminsa mesora.
Esey a conduci na detencion di e sospechoso algun dia despues di e atraco.
Polis a indica cu no ta descarta cu mas detencion lo cay den e caso aki.
Cu e accion di e Atraco Team Cuerpo Policial ta manda un mensahe bon cla pa tur esnan cu tin pensa di comete cualkier delito, cu bo no ta scapa.
KPA ta pidi tambe cualkier persona cu por tin mas informacion di e caso aki of cualkier otro crimen, pa yama tip line di polis cu ta 11141.
Tur cos ta keda anonimo.
