‘Pa esnan cu deal cu arma di candela ilegal sinti rosea cayente di polis riba nan’

Lito Lacle di SPA mester cambia strategia:

• Proyecto baki rond di Aruba no a duna resultado 

ORANJESTAD (AAN)-- Manera ta conoci, e miembro di KPA señor Lito Lacle, a fungi tambe como Vocero Policial, y a traha den otro departamento prome cu a bira Presidente di SPA (Sindicato di Polis Arubano), y den entrevista cu DIARIO a señala cu, historicamente, a wordo mustra cu porta arma di candela ilegal, no ta traha den Aruba su cultura.

   Lito Lacle,  tocante e tema aki, a sigui bisa cu un inversion grandi a wordo haci pa pone bakinan full rond di Aruba, pa esnan cu tin armanan ilegal deposita nan, pero asina mes no a logra e meta.

   “Nos tin cu busca un otro strategia pa cu esaki, y si puntra mi tocante criminalidad, nos tin cu zorg pa e persona cu ta deal cu arma di candela sinti cu enberdad nos tin un rosea cayente riba nan. Si nos wak e ultimo resultadonan, no ta mustra esey”, Lacle a expresa.

   Lito Lacle a declara cu KPA mester bolbe traha riba e parti represivo y e parti preventivo otronan tin cu traha cu ne.

   “Conhuntamente, nos tin cu yega na cifranan cu na final di aña nos wak cu nan ta baha. Pasobra te aworaki e ta un ‘tiki’ alarmante” Lacle a acentua.

   E hecho cu Ministerio Publico a saca un rapport cu mas di 800 mucha ta cay den man di Ministerio Publico, ta mustra cu KPA cu un tekort di personal di mas cu 40% lo tin hopi trabao pa haci. So bo wak bon si algo pasa nos ta cuminza un investigacion y ta resolve e casonan ey. Mi coleganan ta resolve e casonan ey toch, cu e poco material cu nan tin, poco recursonan y poco capacidad y toch bo ta wak un resultado positivo”, Presidente di SPA a asegura.

   Lacle a manifesta cu aworaki a bin cu leynan, pasobra body camp y dash camp ta hopi importante, y e ta keda para riba esaki. “Mester bin of cambia cierto leynan. Mi tin entendi, ultimo biaha cu mi a papia cu personal di DWJZ (Departamento Huridico), cu cierto cosnan mester a wordo cambia den e Landsverordening Politie,  y nan a wordo cambia.

   Legalmente nos por uza esakinan tur caminda, y e ta zorg pa investigacion tuma lugar mas lihe posibel. Awo tin coleganan cu ta warda riba un investigacion caba y despues haya un resultado, por ehemplo, di Ministerio Publico cu nan ta wordo persigui. Tin coleganan a warda 17 luna pa haya e resultado aki. E resultadonan aki por dura menos, si por ehemplo, nos tin tur nos cosnan in place”, Presidente di SPA a expresa.